انفلونزا الطيور

بسم الله الرحمن الرحيم

انفلونزا الطيور

ايه مرض انفلونزا الطيور ده ؟

والله من اسمه كده .. انفلونزا يعني بيجي علي صورة الانفلونزا العادية ... والطيور يعني متعلق بالطيور او ان لططيور عامل كبير في المرض ده. ودا طبعا هينقلنا لنقطة مهمة وهي ازاي الطيور بتلعب دور في المرض ده ( طرق العدوي ) :

1- الاحتكاك المباشر بالطيور المصابة وخصوصا لان الفيروس بيعيش علي الريش
بتاع الطيور وعلي اعضاء الطيور.

2- استنشق ( اشم ) براز الطير المصاب... اللي بيتحول لمسحوق بيطير في الهوا.

3- الطيور المهاجرة طبعا ودي السبب الرئيسي في حدوث المرض عندنا.

4- عدم الطهي الجيد للحوم الطيور او عدم تعرض البيض لدرجات حرارة عالية كافية
لقتل الفيروس.

طيب ايه اعراض المرض ده علي الانسان لو لا قدر الله وحدثت الاصابة ؟

1- احنا قلنا من اسمها شبيهه بالانفلونزا العادية يبقي في ( سخونية – عطس – كحة – وجع شديد في الزور – وكمان الم في اللجسم كله – وتدهور الحالة الصحية العامة للمصاب )

2- برده ممكن يكون في التهابات في العنين والتهاب رئوي حاد وكمان الحاجة الصعبة جدا اللي هي ضيق حاد في التنفس.

3- لاقدر الله الوفاة ممكن تحصل اذا لم يتم التعامل مع المرض.

طيب ايه بئي اعراض المرض ده علي الطير المصاب ؟

لو العدوي شديدة بين الطيور .... يبقي هتنتشر بشكل سريع بين الطيور وفي كمان كميات كبيرة جدا هتموت بنسبة 100% في خلال يومين. اما لو العدوي متوسطة ..... يبقي هنلاقي ان الريش منفوش شوية وان انتاج البيض قل وفي مشاكل في الجهاز التنفسي. وكمان في طيور مش بتظهر عليهم الاعراض خالص زي البط كدة ( مقاوم جدا للمرض ولكنه حامل ليه )

ازاي اعرف ان لا قدر الله الانسان ده اصيب او شطيت انه اصيب بانفلونزا الطيور ؟

والله لو كان بيتعامل مع الطيور وفجاة حصل له سخونية شديدة يفضل اني اروح بيه للمستشفي فورا وهناك اقول للطبيب انه كان بيتعامل مع الطيور وجتله سخونية فجاة .... بالتحاليل هتثبت اذا كان في اصابة لاقدر الله او ما فيش.

هل في علاج لانفلونزا الطيور ؟

دلوقتي وجود علاج قاطع للمرض مافيش ولكن الاطباء بيوصفوا ادوية الانفلونزا العادية وفي بعض الحلات بتتحسن عليها بس الابحاث شغالة حاليا لاكتشاف ادوية ذات اثر فعال ضد المرض.

في واحد بئي ممكن يسالني ويقولي يعني خلاص ما ناكلش لحم طيور ولا بيض ؟

اقوله لأ طبعا مين قال كده والله لو اللحوم دي اطبخت كويس في درجات حارة عالية تاكد ان الفيروس هيكون مات خلاص وبرده البيض لو اتسلق كويس او عرضته لدرجة حرترة عالية كمان ما فيش خوف.

طيب هل في لقاح ضد المرض ده يحميني منه ؟

بصراحة ما فيش لسة بس برده الابحاث شغالة وبصدد اكتشاف لقاح ان شاء الله

اهم نقطة في الموضوع بئي كيفية الوقاية من المرض ده ؟

1- اولا التعامل مع الطيور لازم يكون بحرص شديد جدا يعني البس ماسك علي وشي
والبس جوانتي في ايدي واتجنب لمس الطيور والتعامل مع البراز بتاع الطيور.

2- طيب اثناء الذبح اغسل ايدي كويس بالمياه السخنة والصابون من اول ما امسك
الطير للذبح للنقل او للطهي واكد على غسل الايدين كويس جدا.

3- اللحوم والبيض لازم يتعرضوا لدرجة حرارة كويسة ويطبخوا كويس علشان حتي لو
فيهم الفيروس نضمن ان شاء الله انه تم القضاء عليه.

4- الادوات اللي استخدمتها في الطهي والذبح اغسلها كويس جدا .

5- طيب لو عرفت ان الطير ده مصاب او شطيت فيه يبقي يا ريت ادبحة واكيسة واحرقه وادفنه كويس .

6- المزارع بئي لازم تتعقم كويس والبلاد اللي مشكوك ان فيها انفلونزا الطيور ما نجبش منها طيور او بيض اطلاقا.

7- عدم لمس الطيور بدون داع ولو حصل يبقي اغسل ايدي كويس بعدها علي طوووول

8- لو شكيت ان شخص مصاب احاول ابتعد عنه مع انه لم يثبت انتقال العدوي من انسان لانسان بس دا احسن .

9- الناس بئي اللي بتشتغل في المزارع برده يغسلو هدوهم واحذيتهم وادواتهم كويس وياريت انا لو باتعامل معاهم ما السش الحاجات دي.

10- تغيير الملابس بعد التعامل مع الطيور

لو في اي تعليق او اضافة للموضوع يا ريت تبلغوني علي طووووووووووول علشان اعدله ودا قبل يوم الاحد ان شاء الله.

جزاكم الله كل خير يادكتور

بس عندي شوية استفسارات

4- عدم الطهي الجيد للحوم الطيور او عدم تعرض البيض لدرجات حرارة عالية كافية
لقتل الفيروس.معني كده ان لو هيا مصابة والشخص محتكش بيها قبل الدبح واتعرضت لدرجات حرارة كافية
هتتم الاصابة برضه ولا ايه ؟؟؟؟؟؟
خلاص فهمته من الاسئلة اللي بعده

1- احنا قلنا من اسمها شبيهه بالانفلونزا العادية يبقي في ( سخونية – عطس – كحة – وجع شديد في الزور – وكمان الم في اللجسم كله – وتدهور الحالة الصحية العامة للمصاب )أعتقد ان كده ممكن اي حد يحسبها انفلونزا عادية لتشابه الاعراض فمش هيهتم
يبقي لازم ننوه وننبه علي ضرورة ان اي من الاعراض ديه ممكن يكون ليها احتمالات كتيرة والحرص احسن يبقي لازم يطمنوا علي طول ولا ايه ؟؟؟؟؟؟

زي البط كدة ( مقاوم جدا للمرض ولكنه حامل ليه )حامل ليه لكن ممكن ينقل العدوي مش كده ؟
يبقي ايه الطريقة انك تعرف بيها انه مصاب؟؟؟؟؟؟

5- طيب لو عرفت ان الطير ده مصاب او شطيت فيه يبقي يا ريت ادبحة واكيسة واحرقه وادفنه كويس .
اعتقد انها لو اترمت في الشارع هتنقل العدوي لبقية الناس يبقي لازم برضه نشدد علي الحتة ديه

1- اولا التعامل مع الطيور لازم يكون بحرص شديد جدا يعني البس ماسك علي وشي
والبس جوانتي في ايدي واتجنب لمس الطيور والتعامل مع البراز بتاع الطيور.
10- تغيير الملابس بعد التعامل مع الطيور
للاسف معتقدش ان حد ممكن يعمل كده

تمام .... بالنسبة لانفلونزا الطيور .. الاعراض يعني على الانسان اكتر حاجة هي القصور الحاد في التنفس والتهابات في العين والالتهاب الرئوي اضافة الي الاعراض العادية

بالنسبة للبط طبعا ممكن ينقل العدوي دا من اخطر الحاجات لانة يعتبر ناقل صامت للمرض دون ظهور الاعراض عليه

التشخيص فعلا صعب انا معاكي بس من تاريخ المرض يعني لو المريض اعتقد ان السخونية وضيق التنفس اللي جاله ده بسبب تعامله مع الطيور يبقي لازم يروح المستشفي بسرعة ويقولهم او المرافق اللي معاه يقولهم ان ليه تاريخ سابق بالاحتكاك مع الطيور.

اما حكاية الماسك ولمس الطيور وتغيير الملابس .... انا هدفي في التقيف الصحي تقديم المعلومة فقط وليس علي التنفيذ... واكيد صعب التنفيذ

مشكورة علي التعليق
ومستني بقية التعليقات

السلام عليكم ورحمة الله وبركاتة
بجد الموضوع حلو اووووووووووى وكمان واضح جداااااااااااااا وباسلوب بسيط اوووووى
يعنى فهمت تمام ومش هنتعبكم؟
وكمان مفيش اسئلة؟
وربنا يعنا اننا نقولة ونوصلة بشكل كويس ونفيد الناس بية يا رب
بس يبقى طريقة عرض الموضوع ؟وهيبقى شكلنا ازاى؟ ربنا يسطر؟
مشكور Dr-Greenlight
وربنا معانا
حبيبة الرحمن